Pobra do Brollón volve á 'arqueoloxía de aldea'

Na parroquia de Salcedo (A Pobra do Brollón) existe un castro emprazado a media ladeira, nun espectacular tramo do río, chamado As Penas do Castelo. O xacemento está nunha pendente espectacular e protéxese cun foxo e unha importante muralla que rodea a fortificación. "Todo parece apuntar", sinalan desde o concello da Pobra do Brollón, "que se trata dun castelo altomedieval de considerables dimensións, aínda que non se descarta que puidera ter un uso anterior". O concello avisou que a finais de xuño se realizará unha limpeza vexetal con control arqueolóxico que permitirá entender un pouco máis a fortificación. No proxecto participan o concello da Pobra do Brollón, a Asociación de veciños de Salcedo e a comunidade de montes da parroquia, coa intención de conectala cos distintos recursos turísticos do concello. Abriron diferentes sedes en redes sociais para crear unha comunidade virtual veciñal que coñezan os progresos da investigación e posta en valor.