AveLina Pérez estrea Por favor, ténteo novamente máis tarde

Un proxecto que "é un intento de supervivencia, é querer fuxir do ruído, é compartir espazo sen ollarnos mentres morremos por facelo, é buscarme e é buscarte". Así se define Por favor, ténteo novamente máis tarde, a nova montaxe de AveLina Pérez en colaboración coa Sala Ensalle e o Centro Dramático Galego. O espazo vigués acolle a estrea desta obra que aborda a vulnerabilidade "en contraste con todo iso que nos queren facer crer que é vivir" entre o 11 e o 13 de xuño.


A obra está escrita e dirixida por AveLina Pérez, que comparte escenario con Daniel Casquero a representar "dúas persoas, cada unha co seu mundo, inmersas no ruído, transitan polas súas obsesións e desamparos". Segundo explica a presentación do proxecto, "a dramaturxia constitúese arredor do pensamento individual, anulando a posibilidade de comunicación inda que esteamos, paradoxalmente, propiciando o encontro. Acompañando esta individualidade: o ruído".