A sala viguesa Ensalle en colaboración coa Axencia Galega das Industrias Culturais (Agadic) presentaba onte o Proxecto .EXE. O Espazo Xerador Ensalle nace como "plataforma de residencias artísticas e técnicas para promover a busca de novas narrativas, a profesionalización e unha maior visiblidade da creación contemporánea galega". Nesta liña, a sala acollerá ao longo dos vindeiros doce meses un total de 17 compañías en residencias. Os grupos participantes contarán, para alén dun espazo no que traballar, con soporte técnico e loxístico.
O proxecto prevé un mínimo de 80 días de residencias ao longo da temporada, coa perspectiva de promover a investigación "arredor das novas narrativas escénicas, o fomento das confluencias entre as diversas disciplinas artísticas, o apoio á creación a través da coprodución, a captación dun público especializado para testar os traballos en proceso ou a asesoría nos procesos de produción, distribución e promoción". Ademais ofertaranse 20 días de programación para formacións galegas de nova creación ou proxectos xurdidos ao abeiro deste proxecto.
