Deste xeito, poderán optar aos galardóns "maiores de 14 anos con canles de Youtube en galego, autoproducidas e que teñan polo menos cinco vídeos publicados con data posterior ao 23 de outubro de 2020". O prazo para se presentar ao certame estará aberto entre o 10 de setembro e o 22 de outubro deste ano. Abrirase entón un período de votación en liña para que logo un xurado escolla as propostas galardoadas entre aquelas que sumen máis apoios.
A continuar coas propostas formativas paralelas ao certame, a organización desenvolve unha serie de cursos en liña para favorecer unha mellor calidade nas producións galegas para as redes sociais. Deste xeito, o vindeiro 18 de xuño Xoán Escudero, técnico de son e realizador audiovisual explicará xeitos de mellorar a calidade sonora e as gravacións dos vídeos destinados a Youtube. A esta acción seguirán en vindeiras datas outras sobre aspectos legais e dereitos de propiedade intelectual, da man de Bárbara Román, e de posicionamento da creación dixital nesta rede, con Adrián Suárez.
Pola súa banda, o Concello de Boiro acolle este 12 de xuño a edición 10+1 de Olloboi. O Festival de Cinema Escolar ten xa na rede os traballos finalistas desta xeira, na que a organización remoza as categorías "para favorecer que as obras seleccionadas sexan o máis representativas posible". Deste xeito, as peza competirán nos premios a Olloboi Peque, Olloboi +18 (Ficción e Non ficción) e, nas categorías xerais, Videoclip, Comprometido, Videoarte, Guión, Non ficción e a novidade Olloboi Wabisabi, "unha categoría moi enfocada á creación adolescente".
No marco do festival entregaranse ademais as mencións Mestras polo futuro á peza con máis sensibilidade artística na Educación Ambiental e a de Mellor Iniciativa Audiovisual, que recae sobre o programa Vidas Mariñeiras do GALP Golfo Ártabro Norte. A xornada incluirá tamén a pre-estrea do documental Cadernas de Olloboi, que repasa os 10 anos de percorrido do festival, e mais unha actuación da orquesta Por min, swing.