Youtubeiras recupera a presencialidade na súa sexta edición

Coa chegada de xuño arrincan tamén dous dos principais certames audiovisuais en rede do país. Youtubeiras presentaba na mañá deste día 1 a súa sexta xeira, que co lema Para rede, a nosa quere alargar a comunidade creadora galega en Internet. Para isto, o certame recupera a presencialidade no encontro creativo e nas xornadas, ao tempo que reestrutura as súas categorías e achega outras novidades.

Entre as novas propostas desta xeira, a organización do certame desenvolverá un catálogo de youtubeiras e youtubeiros, que pretende "favorecer a visibilidade a través da web e das redes sociais do proxecto, propiciar unha comunidade máis consolidada e ofrecerlle ao público un lugar de referencia na búsqueda de contigo dixital en galego". Segundo adiantou Socorro García Conde, representante da organización de Youtubeiras, nesta xeira quérese tamén facer unha aposta particular polos videotitoriais, co obxectivo de "sumar persoas de todas as idades que poidan facer vídeos con habelencias concretas en ámbitos de todo tipo, que compartan vídeotitoriais para resolver problemas do día a día”.

Ademais, o evento aposta pola presencialidade en propostas como o encontro creativo Megacolab, que se desenvolverá o vindeiro 18 de xuño en Compostela dinamizado por Gingko. Para o 21 de setembro está prevista a conversa en liña titulada Unicornios e linguas non hexemónicas na Rede, que reunirá as canles Canal Malaia (Catalunya), PlayPresta (Asturies), Iruñe @ARKKUSO (País Vasco) e Youtube en galego. Finalmente, en decembro desenvolverase un obradoiro formativo sobre claves de facturación, declaracións fiscais, o traballo por conta propia e as fórmulas de declaración dos ingresos acadados en Youtube.

Nas bases permitirase a participación de canles de Youtube cun único vídeo publicado, e as categorías da xeira serán Youtubeira/o, canle, vídeo, youtubeira/o revelación, premio á calidade lingüística, pioneiro, rede e premio do público. Os sete primeiros apartados recibirán premios de 1.000 euros, mentres que no último caso a dotación económica será de 500 euros. O prazo de inscrición para competir no concurso abrirá o 27 de setembro e finalizará o 25 de novembro.

O certame está organizado polos servizos de normalización lingüística dos concellos da Baña, Ames, O Grove, Moaña, Negreira, Pontevedra, Rianxo, Ribadeo, Rois, Santiago de Compostela e Teo, das universidades da Coruña, Santiago e Vigo e da Deputación da Coruña.

Olloboi
Pola súa banda, o festival de cine escolar Olloboi celebra o vindeiro día dez a súa nova edición. No programa, como é habitual, está a realización de curtametraxes ao vivo na vila de Boiro, o cinefórum Do documental á ficción de Eloy Domínguez e a gala de entrega de premios, ademais de diversas actuacións.

O proxecto ten xa na rede as 118 curtametraxes que entran a concurso este ano, realizadas en máis de corenta centros de todo o país. A organización do certame publicou tamén en aberto na rede o filme Cadernas de Olloboi, no que repasa a historia dos dez primeiros anos desta iniciativa audiovisual.