Youtubeir@s incrementa de novo os seus premios para a edición 2020

Novas categorías, máis premios e unha maior dotación económica. A edición 2020 do certame de creación audiovisual Youtubeir@s deu a coñecer as súas bases para 2020 a anunciar un total de 12 galardóns, tres máis que na última edición, que repartirán 7.500 euros en premios, o que supón un incremento de mil respecto a 2019. O certame, ao que se poden presentar vídeos en galego publicados desde o pasado 27 de setembro de 2019, reorganiza as súas categorías de participación, e así desaparecen as xa clásicas "vídeo-facermos" e "vídeo-opinarmos".

Os vídeos presentados á nova xeira da convocatoria poderán competir polos premios a mellor Youtubeir@, canle e vídeo individual, con cadanseus 1.000 euros. A maiores, haberá galardóns, dotados con 500 euros, a recoñecer a calidade lingüística, o impacto, a calidade técnica, a comunicación, a creatividade da proposta, ao mellor vídeo musical, o proxecto didáctico máis destacado, o carácter pioneiro para achegar o galego a novos ámbitos e mais unha última categoría seleccionada por votación do público. O prazo de inscrición estará aberto entre o 27 de maio e o 23 de outubro deste ano.