Youtubeir@s entregou os seus galardóns

Unha gala o pasado 29 de novembro deu a coñecer os traballos premiados na III edición de Youtubeir@s. Aaron Vilariño foi recoñecido na categoría de Vídeo-Facermos por un traballo sobre o gas radón, mentres que Xacobo de Toro impúxose en Video-Opinarmos cunha produción que aborda a creación dos cantís da Praia das Catedrais. O mellor Vídeo-Cantarmos foi o de O queimaserebros, de Blanca e Tinta, mentre Aquel-e foi recoñecido co premio á Mellor Canle.

O Premio á Creatividade levouno Cativos na Cociña, de Siradella Films mentres MJ Pérez obtivo o de Eficiencia Comunicativa por Rosalía Ft. Rosalía-Malaxente (MJ Cover). O vídeo de Os Novos Quero Fugir, realizado por Aaron Vilariño acadou o Premio á Calidade Técnica e 21 días improvisando de A Rabela, o de Calidade Lingüística. Flow de Toxo levou o premio á #propostayoutubeira.

Pola súa banda, o proxecto audiovisual Aturuxo Films, do IES de Cacheiras, en Teo, conseguiu un dos premios ás boas prácticas educativas que outorga o Ministerio de Educación. En concreto, o proxecto Imaxinando músicas, foi recoñecido na categoría de Desenvolvemento de Competencias de Lectoescritura, Audiovisuais e Alfabetizacións Multiples. Esta iniciativa combina a creación de pezas musicais para filmes coa elaboración de pezas audiovisuais a partir de música, e pon en colaboración o traballo no centro de ensino co Conservatorio Profesional de Música de Santiago de Compostela. O premio conta cunha dotación de 10.000 euros.