O III Youtubeir@s amplía calendario e a dotación dos seus premios

A Facultade de Ciencias da Comunicación de Santiago de Compostela acolleu esta mañá a presentación da terceira edición de Youtubeir@s. O proxecto de creación audiovisual que coordinan os servizos de normalización lingüística de trece concellos, as tres universidades e a Deputación da Coruña amplía a dotación dos seus premios, que pasa de 5.500 a 6.500 euros. Ademais, engade a categoría de vídeo-cantarmos, dedicada a audiovisuais de carácter musical, ás xa existentes de vídeo-facermos, vídeo-opinarmos, canle, creatividade, eficiencia comunicativa, calidade técnica e calidade lingüística. A estes oito galardóns, súmase o premio do público, chamado #propostayoutubeira. O prazo de Inscrición para os galardóns está aberto ata o vindeiro 27 de setembro.

A isto súmase como novidade a inciativa Youtubeir@s en conexión, que pretende "consolidar a comunidade de youtubeiros e youtubeiras xa existente, ampliar a súa base social, dar visibilidade ao seu traballo de creación na rede en galego e fomentar o intercambio e o debate". Con estes fins organizaranse dous eventos na Coruña. Lista de reprodución ao vivo permitirá aos comunicadores participantes compartir a súa experiencia co público asistente. Pola súa banda, a Xornada para Youtubeir@s convida a "reflexionar sobre o panorama creativo a varios niveis (lingüístico, temático, creación de públicos), de xeito que se propicie un lugar de reflexión e conexión para tecer redes e, ao tempo, fortalecer a comunidade entre as persoas creadoras", segundo explica o propio proxecto.

No campo formativo, o proxecto achegarase de xeito particular ao alumnado de secundaria mediante cursos e obradoiros de formación. A produtora Illa Bufarda, a actriz Laura Villaverde ou Marga Rodríguez Tilve serán algunhas das responsables destas actividades.