Localizan a gravura dun sol nun dolmen de Friol

Aínda que moi posiblemente boa parte das cámaras funerarias dos dólmenes galegos estaban decoradas e algunhas conservan aínda gravados, non sempre é doado recoñecer os motivos. Pero o colectivo Patrimonio dos Ancares está convencido de ter identificado un impactante sol no esteo da mámoa número 2 da necrópole de Costa de Mera (Guldriz, Friol). A figura, un círculo rodeado de catorce liñas radiais, está ubicada no esteo que coincide de fronte co leste e a nacenza do sol. Desde Patrimonio dos Ancares destacan a excepcionalidade do achado en Galicia, onde non se conserva ningún outro soliforme tan definido coma este, aínda que se ten proposto esa interpretación para algunhas outras gravuras megalíticas. Na fotografía desta nova, e en contacto con Patrimonio dos Ancares, retocamos dixitalmente a gravura para facilitar a súa identificación polos lectores. Aínda que o dolmen xa era coñecido e mesmo se identificaran nos noventa unhas gravuras cruciformes, a figura pasara inadvertida ata que Brais Rodríguez Romero, membro do colectivo, o identificou recentemente.