O mestre e anterior editor de Xerais Manuel Bragado reuniu nunha 'chiografía' todos os chíos que foi publicando desde primeiros de ano sobre a vida e obra da poeta Xela Arias, "lembrando a aquela serie tan xeitosa de Fotobiografías que publicamos en Xerais dende 1989 para retratar visualmente á figura homenaxeada o Día das Letras Galegas". O documento, accesible de balde desde o propio blog de Bragado, reúne esta colección de chíos en 225 páxinas, organizados cronoloxicamente como o propio Twitter, que se irá actualizando conforme avance o ano.
