Consolidan a primeira muralla do castro de Chandebrito

Os restauradores xa se atopan no castro de Chandebrito (Nigrán) para restaurar e consolidar a muralla que cingue o recinto superior do castro, no que está documentada actividade nos inicios da Idade do Ferro, ao redor do século VIII a.C., e que converten a este xacemento nun dos poucos en Galicia con restos visibles e musealizables dese período tan antigo. Para esta intervención, efectuada por Árbore Arqueoloxía, consignouse unha partida de 13.000 euros. Restauraranse aproximadamente uns 110 metros cadrados de muralla. Adicionalmente, o concello de Nigrán pensa solicitar un proxecto para escavar outros 400 metros de terreo entre esta muralla e o recinto inferior, para o que se prevé aproveitar un remanente de tesourería de 11.000 euros.