O concello da Coruña pensa destinar o cárcere á "produción e xestión audiovisual"

Hoxe coñeceuse a proposta de usos que está a manexar a área de cultura do concello da Coruña para o antigo cárcere provincial. O seu uso "principal" sería para a "creación e xestión audiovisual", tendo en conta a relevancia da cidade coruñesa no sector audiovisual tanto no ámbito formativo como empresarial. Ao documento tivo acceso o xornal La Opinión, que publica detalles sobre esta funcionalidade. Sería un "espazo de residencia, traballo, formación e orientación profesional" que se organizaría "en áreas de coworking para iniciativas invitadas e residentes que fomenten o emprendemento audiovisual". Todo parece indicar que a fórmula de xestión non sería unicamente pública , xa que podería ser "ineficaz" e o edificio converteríase "nunha carga para o concello". O inmoble tamén acollería propostas relativas á Torre de Hércules, á memoria histórica, ou á articulación social dos barrios próximos. O cárcere da Coruña foi obxecto dunha recuperación por parte do proxecto Cárcere durante o goberno da Marea Coruñesa, despois de pechar os seus usos como institución penitenciaria e de reinserción social en 2012, e na actualidade está sen usos, pendente dun plan director e da resolución das circunstancias administrativas, que implican un pagamento de máis dun millón de euros por parte do concello coruñés ao Ministerio do Interior pol inmoble.