O catálogo Films from Galicia recolle 63 producións do país

Unha selección de 63 producións e proxectos de cinema e televisión. Isto é o que achega a nova edición do catálogo Films From Galicia que presentaba a Axencia Galega das Industrias Culturais este 21 de abril. A publicación é a principal ferramenta de promoción do audiovisual galego en mercados e foros internacionais e, para alén da edición física e dixital conta tamén cun vídeo promocional que xa se presentou na última gala dos premios Mestre Mateo.

A nova edición do catálogo recolle, segundo sinala a Agadic, 9 longametraxes de ficción rematados e 14 en desenvolvemento na sección Pics e 12 documentais realizados e 11 en proxecto no apartado Docs. A sección Toons pola súa banda inclúe cinco títulos de animación de próxima estrea mentres TV Series achega oito producións televisivas que xa chegaron ás pantallas e outras catro con estrea pendente.

Entre os títulos que fan parte da proposta figuran longametraxes como Cuñados, Jacinto, 9 Fugas, María Solinha, Ons, Lúa vermella, Hasta el cielo, A illa das mentiras ou Eles transportan a morte en Pics; A Cero 5, Alén da Terra, No somos nada, Escribir o imposible, Clown’s Planet, Eu tamén necesito amar, El futuro de la mente, Nación, Resonancias do pasado, O gran Camiño, A poeta analfabeta e A virxe roxa en Docs; e 3Caminos, Chegar a casa, Auga seca, Hierro, O sabor das margaridas, Método criminal, La Unidad e A lei de Santos en TV Series.

De cada unha das producións incluídas recóllense "datos dos equipos, as sinopses argumentais e contactos internacionais de cada produtora, así como os principais apoios obtidos polos proxectos".