A cancelación do Resurrection Fest ata 2022 xa está confirmada

Unha tras outra, sen demasiada sorpresa, as citas máis multitudinarias van caendo dos calendarios como xa pasara no 2020. Os avances na situación pandémica non permiten predicir a posibilidade de levar a cabo este tipo de eventos este ano e por tanto resulta imposible a súa preparación, con especial impacto no sector dos festivais musicais. Se fai pouco era o festival Portamérica o que anunciaba o seu aprazamento ata o ano 2022 agora é o Resurrection Fest o que comunica que a súa 15ª edición realizarase do 29 de xuño ao 2 de xullo de 2022, na fin de semana habitual dos últimos anos. Este ano a organización renuncia en principio a levar a cabo calquera adaptación en formato semi-presencial, como intentara o pasado 2020 véndose obrigados a cancelalo cuns poucos días de antelación ante a prohibición do concello de Viveiro, pero adiántalle aos seus seguidores que ten "unha gran sorpresa" para este 2021, que revelará máis adiante. As empresas organizadoras de Rescurrection fest e Portamérica son tamén, en UTE, as que organizan o festival O Son do Camiño en Santiago, poloc al é de agardar novas na mesma liña sobre este evento, que conta co apoio da Xunta de Galicia.

No seu comunicado, a empresa organizadora do festival de rock en Viveiro amósase esperanzada de cara ao 2020 para a volta á normalidade "xa que por fin vese a luz ao final do túnel grazas á vacinación masiva", sinalan. Segundo a empresa ao cargo do Resurrection Fest, na edición de 2020 haberá un cartel artístico "similar ao de 2020 e 2021, mantendo moitísimas das bandas e con novas sorpresas. Será un dos mellores carteis que xamais tivemos", aseguran. O festival agradece a confianza e fidelidade do seu público, comprobada no número mínimo de peticións de devolución que tiveron o pasado ano. Todas elas serán válidas para o seguinte ano pero tamén será posible solicitar a devolución. Ademais anuncian a creación dunha plataforma propia do festival para poder revender "éticamente e de maneira segura" as entradas a través deste sistema.. O Resurrection fai un chamamento para que "na medida do posible" a xente garde as entradas mercadas,"para que o festival poida seguir adiante con forza e facer a edición máis épica de nosa historia".