Lourenzo Fernández Prieto no web da RAG
A Real Academia Galega acordou esta fin de semana nomear o historiador Lourenzo Fernández Prieto como membro de número da entidade. O catedrático de Historia Contemporánea da Universidade de Santiago de Compostela ocupa a vacante que se produciu polo pasamento de Luz Pozo Garza en abril de 2020. A entidade destaca do investigador que é "un recoñecido historiador nas dúas grandes liñas de investigación que desenvolve" a historia agraria contemporánea e o estudo da guerra civil e do franquismo.
O pleno oficializou tamén a conclusión do mandato de Víctor F. Freixanes, elixido presidente da entidade hai catro anos. Con esta declaración comeza o proceso para escoller unha nova comisión executiva, que se desenvolvera ao longo de tres meses. Durante este período será o secretario da executiva saínte, Henrique Monteagudo, quen ocupará a presidencia de xeito interino e porá en marcha o proceso electoral.
