Un dos petróglifos danados en Campo Lameiro. Fonte: Concello de Campo Lameiro.
O Concello de Campo Lameiro facía público este 23 de marzo o atentado que sufriron os petróglifos da Laxe da Rotea de Mendo, declarados Ben de Interese Cultural. A cámara municipal denunciou ante a Dirección Xeral de Patrimonio e mais a Garda Civil que dous gravados desta estación rupestre foron danados "pola acción vandálica de descoñecidos que raiaron cunha pedra parte destas emblemáticas representacións arqueolóxicas".
Segundo apuntou o concello nas redes sociais "os petróglifos apareceron riscados e remarcado por unhas pedras de xeito abrasivo e con graves danos para estas representacións", e solicita colaboración veciñal para localizar as persoas responsables deste atentado contra o patrimonio. Precisamente esta estación fora obxecto dunha intervención de conservación e posta en valor recente. Tanto desde a veciñanza como desde particulares e de diferentes colectivos de defensa do patrimonio amosouse unha importante indignación polo dano.
