A Deputación de Pontevedra convoca axudas para actividades culturais

Achegará 250.000 euros a entidades non lucrativas para iniciativas que se desenvolvan na provincia

Un total de 250.000 euros é a contía da convocatoria de subvencións a entidades sen fins de lucro para desenvolver actividades culturais que acaba de presentar a Deputación de Pontevedra. O Boletín Oficial da Provincia deste 15 de novembro publicaba as bases desta liña, que prevé axudas dun máximo de 2.500 euros por solicitude e que dará prioridade ás "accións tendentes a mellorar a calidade de todas as manifestacións culturais, en especial as actividades dirixidas á reivindicación e á difusión do patrimonio material e inmaterial da provincia de Pontevedra, contribuíndo deste xeito á difusión, ao mantemento e á recuperación da nosa cultura e das nosas tradicións".

Entre as accións que se apoiarán póñense como exemplo "actividades para a posta en valor do patrimonio inmaterial propio das vilas e comarcas da nosa provincia (costumes, tradicións, etnografía, crenzas e mitos)", "festivais, mostras, encontros e certames culturais", "certames e actividades de posta en valor da pintura, a escultura, a arquitectura e a banda deseñada" ou "intercambios culturais para potenciar o patrimonio musical fóra da Comunidade Autónoma de Galicia". Pódense presentar entidades con sede na provincia ou que vaian desenvolver as súas actividades neste territorio. O prazo para as solicitudes está aberto ata o vindeiro 15 de abril.