Onte inaugurouse no centro cultural Marcos Valcárcel da Deputación de Ourense a exposición "Galicia de Nós a nós". A exposición chegou á cidade das Burgas trala súa estrea na Cidade da Cultura e unha asistencia de 15.000 visitantes, e canda este centro cultural tamén se poderá visitar na sala de exposicións Afundación. Conta con 134 números da revista e máis de 300 pezas procedentes de máis de 60 institucións culturais e coleccionistas privados. "Galicia de Nós a nós" poderase visitar en Ourense ata o 18 de abril.
