A Xunta anuncia a contratación do Plan Director do Parque do Pasatempo

O conselleiro de Cultura, Román Rodríguez, anunciou hoxe que a Xunta iniciará as vindeiras semanas o proceso de licitación do Plan Director do Parque do Pasatempo (Betanzos). "O obxectivo é que este sexa un documento amplo que responda ao que o Pasatempo demanda, así como á complexidade das actuacións", sinalou Rodríguez. A consellería sinalou que o documento tamén fará unha diagnose da situación actual do Pasatempo e marcará as liñas de actuación futuras en relación á recuperación do ben. O conselleiro fixo estas declaracións durante a visita ás obras de restauración da igrexa de San Francisco promovidas polo goberno galego co obxectivo de reparar diferentes problemas de humidades do templo e na que se investiron 350.000 euros.