Os Náufragos Teatro estrea na Coruña a historia biográfica 'Pura'

O Teatro Rosalía de Castro da Coruña acollerá na súa reapertura, este sábado 20 de febreiro, a estrea de Pura, a nova produción da compañía local Os Náufragos Teatro. Pura é unha obra atípica ao tratarse da escenificación dun relato biográfico baseado nas vivencias dunha persoa actualmente presente e veciña da cidade herculina. O director e autor Gustavo del Río trasladou á dramaturxia as memorias transmitidas oralmente pola súa avoa, Pura, de 94 anos, para elaborar esta montaxe que conta sobre as táboas con Denis Gómez, Rebeca Vecino, Nicolás Gaude e Santi Cuquejo. Con Pura a compañía fai unha homenaxe ás persoas maiores e tamén unha reflexión sobre os cambios radicais na cidade neste percorrido vital dunha persoa de case 100 anos e nas vidas cotiáns do seu entorno, buscando a maxia da viaxe a un pasado do que Pura é memoria viva e pode asistir para velo representado. A compañía coruñesa cumpre agora 20 anos de andadura.