Novos proxectos eólicos espertan prevencións polo impacto no patrimonio cultural

Os novos proxectos de parques eólicos para diferentes parques de Galicia están a espertar numerosos movementos de entidades administrativas locais, movementos veciñais e plataformas. En Vimianzo, tanto o concello como asociacións como a parroquial de Berdoias, o colectivo A Rula ou o Semescom presentaron alegacións en relación ás afeccións sobre o patrimonio cultural, que inclúen estacións de arte rupestre, o dolme Casota de Freáns ou varios camiños tradicionais. No caso do Monte do Gato de Coirós, a empresa Greenalia informou de que vai realizar un novo informe patrimonial tralas alertas emitidas pola bióloga Mónica Fernández-Aceytuno, quen sinalou a existencia de túmulos megalíticos na área afectada -que rexistra unha coñecida densidade de restos megalíticos. E no Ulla, en Padrón e A Estrada colectivos e grupos políticos tamén preparan mobilizacións ante o proxecto de instalación de varias torres eólicas na contorna de Castro Valente, unha singular fortificación arqueolóxica de época tardoantiga ubicada no alto do monte.