Acto de presentación do acordo sobre os orixinais de Nós. Fonte: Deputación de Pontevedra
A Deputación de Pontevedra formalizou este 8 de xaneiro a adquisición dos cincuenta e un debuxos orixinais do álbum Nós de Castelao, que pasan así a facer parte dos fondos do Museo de Pontevedra. O feche do trato permitiu coñecer finalmente datos como a contía do acordo e a identidade dos propietarios destas obras, ata o momento confidenciais. A institución provincial pagou finalmente 650.000 euros polos traballos, que xa estaban en depósito no Museo desde 2016. A familia de José Lino, amigo e caseiro de Castelao foi a que tivo durante anos en custodia deste patrimonio, que estivo fóra do coñecemento público ata ese ano, en que a cederon para a exposición que o Museo lle dedicou ao rianxeiro. A familia asegura que o propio Castelao lle agasallou este legado a José Lino en "recoñecemento ao seu traballo, lealdade e colaboración desinteresada", dentro dunha relación de estreita amizade.
