A quinta xeira do festival Novos Cinemas fechaba este 20 de decembro dando a coñecer o seu palmarés. Il N'y aura plus de nuit, de Eléonore Weber, foi seleccionada polo Xurado Internacional, formado por Elena Duque Viña, Pela del Álamo Herrera e Nuria Giménez Lorang, para recibir o Premio Novos Cinemas á mellor longametraxe da Sección Oficial. O filme obtivo ademais unha mención do Xurado Novo. O premio deste comité á mellor dirección da Sección Oficial foi para Illum Jacobi polo seu traballo en The Trouble with Nature. O xurado da crítica, pola súa banda, outorgou o seu premio a Tal día hizo un año de Salka Tiziana.
Anunciaron Tormenta, de Javier Fernández foi recoñecido co Premio Latexos, mentres o público seleccionou Dramarama de Jonathan Wysocki como o seu filme preferido. Dalibor Baric obtivo tamén unha mención do Xurado Internacional por Accidental Luxuriance of the Translucent Watery Rebus.
