Vinte anos despois de ter levado a escena co Centro Dramático Galego a obra de Albert Camus, Calígula, o director Manuel Guede Oliva volve a poñerse á fronte da súa produción coa Companhia de Teatro de Braga. A estrea no país veciño terá lugar os días 22 e 23 de decembro, no Theatro Circo de Braga, pero este venres haberá unha pre-estrea en Barcelos no Theatro Gil Vicente. Guede foi director do Centro Dramático Galego dende 1991 ata 2005, cargo ao que regresou en 2012 ata 2015. No ano 2000 dirixiu na compañía pública galega unha produción de Calígula protagonizada por Antonio Durán Morris. Con esta nova volta a esta peza fundamental da literatura dramática contemporánea coa compañía lusa, Guede Oliva dá ese papel por vez primeira a unha muller, a actriz Solange Sá, á fronte dun elenco de trece intérpretes. Tras estas representacións a obra volverá aos escenarios no ano 2021.O director galego é tamén responsable da tradución da obra, xunto con Silvia Brito.
