Pulan por unha candidatura internacional dos hórreos a Patrimonio da Humanidade

A Asociación de Amigos del Hórreo Asturiano convocou o pasado venres 11 de decembro un encontro entre diferentes entidades do noroeste peninsular para intercambiar coñecementos ao redor dos hórreos de cara a unha posible candidatura internacional para promover os hórreos como Patrimonio da Humanidade. No encontro participaron a Asociación para a Defensa do Patrimonio Cultural Galego (Apatrigal), as asociacións do hórreo cántabro e a leonesa La Brusenda, investigadores da Universidade do Porto e os servizos de patrimonio da Deputación de Biscaia e mais de Navarra. Os participantes confían en contactar nos vindeiros meses con entidades similares doutros países e con institucións para informarlles do proxecto.