Promoven a creación dunha Rede do Patrimonio Cultural

Un grupo de entidades e medios de comunicación vinculados ao patrimonio cultural (Mariña Patrimonio, Gentalha do Pichel, Colectivo A Rula, Asociación para a defensa do Patrimonio Cultural Galego, Historia de Galicia, Sociedade Antropolóxica Galega, Cultura do País, ADEGA, patrimoniogalego.net) acaban de anunciar a celebración, este sábado 3 de xuño, dunha xuntanza aberta no Museo do Pobo Galego para constituír a Rede do Patrimonio Cultural. Segundo a declaración que figura no seu web: "proponse una ferramenta conxunta de coordinación das asociacións locais/comarcais e outras de ámbito galego para se dirixir ás autoridades, organismos ou entidades pertinentes en prol da salvagarda do noso patrimonio cultural". O mecanismo basearase en "crear sistemas de comunicación horizontal, de libre adhesión, sen xerarquías, aos que se poidan incorporar outras organizacións" e o modo de traballo inicial será a "elaboración de iniciativas decididas pola rede que teñan un claro fin de defensa e/ou posta en valor do patrimonio cultural e que pola súa natureza ou dimensión precisen dunha escala superior á de cada unha das entidades".