Culturgal presenta un programa de 70 actividades con 60 horas de retransmisión

Victor López, presidente da Culturgal, Xosé Aldea, director da feira, Jacobo Sutil, director da Agadic, Carme Fouces, concelleira de Cultura de Pontevedra, e Carmela Silva, presidenta da Deputación Provincial, daban a coñecer na mañá deste 20 de novembro o programa da nova edición de Culturgal. A Feira das Industrias Culturais Galegas presentou uns contidos que, na súa maior parte, serán accesibles en liña entre o 27 e o 29 deste mes, cun total de 70 actividades e preto de 20 horas de emisión en cada unha das tres canles temáticas simultáneas dedicadas á edición, a escena e a música. De calquera xeito, pódese participar de xeito presencial na feira, con prazas limitadas e medidas adaptadas á situación sanitaria. Segundo destacou na presentación Jacobo Sutil "Culturgal é punto de inflexión no ano en curso e no que vén, polo que non podía deixar de facerse",mentres a Carmen Fouces apuntou que "Non hai pandemia que poida coa Culturgal".

Na organización desta xeira, a Canle Libro, conducida pola xornalista Esther Estévez, contará con Manuel Rivas, Ledicia Costas, Berta Dávila, Antón Patiño, Miguelanxo Prado, Alberto Vázquez, Kiko da Silva, Suso de Toro e moitos máis nomes do mundo a literatura, a ilustración ou a banda deseñada. Retransmitido desde o Teatro Principal de Pontevedra, este espazo achegará "novidades e xéneros, conversas, os premios do ano, e, por suposto, propostas temáticas ao redor das grandes cuestións derivadas da pandemia que preocupan a creadores, empresas, institucións e sociedade, en xeral".

Desde a Sala de Exposicións do Pazo da Cultura de Pontevedra, a Canle Foro achega un programa de "performance, poesía ou artes escénicas. Tamén encontros ao redor do galego no ensino, na xustiza ou na televisión. Incluso tempo de ópera e breakdance". Mónica Mura, o Centro Dramático Galego, Carlos Varela, Rosalía Fernández Rial, Marta Pérez, Antón Reixa, Aldaolado, Ana Romaní, Vella Escola e moitos máis nomes danse cita nesta canle, conducida pola actriz Iria Sobrado.

Finalmente, na Canle Escena desenvolveranse a transmisións ao vivo desde o Auditorio do Pazo da Cultura de Pontevedra dos novos espectáculos musicais de Luar na Lubre ou Susana Seivane, canda a unha ampla programación para o público familiar. A actriz Diana Sieira será a responsable da presentación.

O único espazo do programa que non contará con retransmisión será a sala de cinema, na que se proxectarán catro longametraxes de ficción e dous documentais. Ons, de Alfonso Zarauza, con concerto da banda Chicharrón, abrirá a feira o venres 27. A illa das mentiras, de Paula Cons, Arima, de Jaione Camborda, Longa noite, de Eloy Enciso, e os documentais Dorothé na vila, de Alejandro Gándara e Olaia Tubío e A media voz, Heidi Hassan e Patricia Pérez Fernández, conforman a proposta cinéfila do evento.