Culturgal celebrará a súa XIV Edición baixo o lema "A cultura que toca"

A recuperar a actividade presencial logo dunha xeira marcada polas propostas virtuais, a XIV Edición de Culturgal celebrarase en Pontevedra entre os vindeiros 26 e 28 de novembro. O presidente da Asociación Culturgal, Víctor López, explicaba durante a presentación do evento, na mañá deste 13 de xullo en Pontevedra, que "a cultura que toca é o lema que escollemos este ano e que queremos que teña un amplo significado, por unha banda, o relativo a fomentar o contacto entre a acción cultural ao vivo e o público, entre as empresas e axentes culturais, coa previsión de que esta Culturgal será a do reencontro, a da recuperación, a do contacto directo coa cultura".

No mesmo sentido destacou que "se sempre é necesaria, pensamos que agora máis que nunca cultura para superar a crise, cultura para fomentar o diálogo, o respecto e a diversidade, cultura como laboratorio dun futuro mellor, cultura como punto de encontro". No acto, López estivo acompañado de Xosé Aldea, director da feira, da deputada provincial Victoria Alonso, do director da Agadic, Jacobo Sutil, e mais da concelleira de Cultura de Pontevedra, Carme Fouces.

Malia a recuperar as actividades presenciais, a nova xeira manterá a aposta pola difusión en liña co desenvolvemento de Culturgal TV, unha canle que a xeito de magazine funcionará como "unha tele cultural de fin de semana", segundo explicou a organización. No calendario presencial, reservarase o venres 26 de novembro para encontros profesionais e os días 27 e 28 serán abertos ao público. O prazo para que empresas, institucións e colectivos reserven os seus espazos para participar no evento está aberto ata o vindeiro 15 de setembro.