Culturgal quere apostar polo público a súa XI Edición

A organización do Culturgal presentaba esta mañá en Pontevedra o programa da que será XI edición da Feira das Industrias Culturais. O Pazo da Cultura de Pontevedra acollerá como é habitual este evento, que se celebra entre o 30 de novembro e o 2 de decembro baixo o lema "Ti levas o compás na Culturgal", a amosar o interese da feira por centrar o seu foco no público. Na presentación, o director da feira, Xosé Manuel Aldea, destacou do programa o concerto de Carlos Núñez o sábado 1,a preestrea de Inversa Teatro o venres 30, e os espectáculos especiais para público familiar, así como a presenza dos principais escritores e escritoras de Galicia. A maiores, a consolidación da sección dedicada á arte contemporánea, o reforzo da sección gastronómica e a creación dun servizo de autobuses para visitar o evento aparecen como principais novidades. En total máis de 80 stands e máis de 120 actividades farán parte do evento.

A feira iníciase o día 30 cas xornadas profesionais de Escena Galega, a convocatoria de proxectos do Xacobeo 2021, o balance de resultados de Fest Galicia, asembleas de Agapi e Asociación Galega de Profesionais da Xestión Cultural ou a presentación de servizos tecnolóxicos para festivais por parte da empresa Play Plan. A partir de aí, comeza unha programación máis orientada ao público xeral na que se inclúen 85 propostas para o público infantil, entre elas concertos como o de OVIRAVAI con Paio e o poder da música e Xoán Curiel con A casa do terror.

Mantense no programa o espazo dedicado á arte contemporánea inaugurado na pasada edición, cons presentacións do último proxecto de Vari Caramés, da sala Apo'strophe Arte ou do libro Anónimas, retratos de musas cotiás de Gemma Marqués e Dolores Costas, ou unha acción do colectivo LAG. No campo das exposicións, poderá verse DAC. Artistas Mulleres de Colección. Fondos do Patrimonio da Deputación da Coruña no Espazo Arte Contemporánea, e Fotografía en Curso. Retrato da nosa contorna, sobre o pedagóxico de creación do mesmo título do CGAI.

No campo da literatura, encontraranse co público nomes como Manolo Rivas, Ledicia Costas, Pedro Feijoo, Eli Ríos, María Reimóndez, Xose Duncan, Francisco Castro, Yolanda Castaño, Manuel Esteban, Iolanda Zúñiga, Emma Pedreira, Héctor Cajaraville, Carlos Negro, Antón Lopo ou Ana Cabaleiro entre outros.