María Dolores Sánchez Palomino. Fotografía da RAG.
A catedrática de Filoloxía Románica pola Universidade da Coruña María Dolores Sánchez Palomino incorporarase á Real Academia Galega como membro numerario da institución. Así o decidiu o pleno que celebrou a entidade na tarde deste 17 de novembro. Sánchez Palomino ocupará a cadeira que ficou vacante polo falecemento do arquitecto Andrés Fernández-Albalat. A nova academia era xa membro correspondente da entidade desde 2004 e está a dirixir a revisión e actualización do Dicionario bilingüe castelán-galego, que pasará a ofrecerse proximamente en liña. A institución acordou ademais celebrar na primeira quincena de decembro o adiado pleno en homenaxe a Carballo Calero se a situación sanitaria o permite.
