O Concello de Vigo financia a restauración de patrimonio eclesiástico

A Catedral de Santiago fecha seis semanas por obras

Un total de 100.000 euros para obras de restauración, mantemento e posta en valor en inmobles da Igrexa. Este é o fondo que o Concello de Vigo achegará ao bispado Vigo-Tui en troca ao dereito do goberno local a utilizar espazos de propiedade eclesiástica para actividades culturais e participativas respectuosas coa fe e a moral católicas. As actuacións concretas vencelladas a este convenio determinaranse entre as entidades asinantes ao longo dos tres anos de vixencia do acordo, segundo informa La Voz de Galicia.

En paralelo, a Catedral de Santiago fecha a partir deste domingo 15 de novembro e ao longo de seis semanas para continuar as tarefas de restauración e acondicionamento do edificio. En concreto, neste tempo retiraranse os andamios que se empregaron nas obras do interior do conxunto, limparase este espazo e recolocaranse nos seus lugares mobiliario, imaxes e outros elementos que foran retirados durante os traballos. A intención é que o templo estea preparado para celebración o 30 de decembro da Traslatio do Apóstolo, previa á apertura da Porta Santa que se desenvolve o 31 e que dará comezo ao Ano Xacobeo.