Nace #follow20, o primeiro festival de deseño galego

Coa intención de anticipar a que será a primeira Galicia Design Week o vindeiro mes de xuño, A Coruña acolle desde o 9 e ata o 13 de novembro a edición 0 de #follow20. O Festival de Deseño Galego bota a andar cunha programación que mestura elementos virtuais e presenciais "poñendo en valor o tecido profesional galego e favorecendo a súa conexión co exterior e o seu achegamento ao gran público". No proxecto atópase a serie documental sobre deseñadores do país Stories, charlas temáticas, un escaparate de creacións e espazos de deseño do país, un portafolio de novos creativos e un programa paralelo en liña e presencial. A Praza de Lugo na Coruña acolle as actividades físicas do evento, entre elas un Showcase de traballos de profesionais do sector e a exposición a exposición física #novodeseñogalego.

Entre as persoas que protagonizan o encontro, as Stories amosarán o traballo da "directora de arte Lucía García Rey, a marca de moda infantil The Campamento, a ceramista Verónica Moar, a axencia de branding Costa, a axencia tipográfica NM Type, o deseñador de iluminación Arturo Álvarez, o estudo de arquitectura Castroferro, é estudo de deseño DARDO e a Fundación DIDAC". Nas Conversas, pola súa banda, centradas na "á industria, a estratexia e a comunicación relacionadas co deseño" participarán "Dani Bembibre, o deseñador de mobiliario Isaac Piñeiro, Lola Dopico, a deseñadora de servizos Coca Rivas, Nuria Carballo, a arquitecta Patricia Muñiz, o infografista Artur Galocha, o tipógrafo Marcos Dopico e a deseñadora gráfica Uqui Permui".

O #follow20 conta cun consello asesor da organización composto por David Barro, codirector do estudio de deseño DARDO e director da Fundación DIDAC; Nuria Carballo, directora da axencia creativa Unconventional; Dani Bembibre, director da axencia de branding Costa; e Lola Dopico, directora da escola de moda ESDEMGA.