O Parlamento insta á Xunta a actuar de cara á recuperación das estatuas do Mestre Mateo

Os tres grupos parlamentarios da Cámara Galega aprobaron este 7 de outubro instar á Xunta a se implicar na recuperación para o patrimonio público das estatuas do Mestre Mateo en mans da familia Franco. A atender a unha proposición non de lei do Grupo do BNG, o Parlamento aprobou en pleno chamar ao goberno galego a "proseguir o camiño aberto da recente sentenza sobre o Pazo de Meirás" co obxecto de "investigar e documentar o espolio das estatuas de Xeremías/Abraham e Ezequiel/Isaac", declaradas BIC, "e estudar as vías para a súa recuperación por parte do Concello de Santiago".

Do mesmo xeito, e no marco desta proposta, acordouse chamar á Xunta a "crear un grupo de traballo co concello de Santiago, aberto á participación da Deputación da Coruña e do Goberno do Estado, así como de especialistas nos ámbitos xurídico e histórico e asociacións de defensa do patrimonio, que valore as liñas de acción de cara á recuperación das esculturas".

En paralelo a esta proposta, Xunta de Galicia e Concello de Santiago aprobaran este 3 de outubro constituír un grupo de traballo "para analizar as últimas evidencias en torno ás estatuas de Abraham e Isaac, atribuídas ao Mestre Mateo, e valorar liñas de acción conxuntas de cara á súa recuperación para o dominio público".