O escenógrafo Carlos Alonso é recoñecido co premio Xograr de Outono

As máis de catro décadas de traballo de Carlos Alonso como escenógrafo, figurinista e deseñador de vestiario de Carlos Alonso acaban de ser recoñecidas co premio Xograr de Outono que outorga anualmente o Festival Internacional Outono de Teatro de Carballo. O galardón, "un nomeamento honorífico que concede anualmente o FIOT á fin de salientar o labor dunha persoa ou entidade que, pola súa traxectoria, destaca na promoción e desenvolvemento do teatro en Galicia" e que "busca poñer en valor o oficio teatral e o traballo desas figuras menos visibles, pero imprescindibles para a escena" súmase aos 11 premios María Casares que acumula o homenaxeado.

Alonso, que traballou en máis de cen montaxes escénicas, tanto con compañías independentes como co Centro Dramático Galego, sinalou que "é unha honra recibir este galardón do FIOT e agradezo o apoio das compañeiras e compañeiros que conforman un grupo que é parte da nosa historia, a historia do teatro galego", segundo recolle a organización do premio.

As anteriores persoas galardoadas con este recoñecemento, canda á Asociación Telón e Aparte, que organiza o Festival, foron responsables da escolla do premiado. O director do FIOT, Alberto Sueiro, destacou que este "é un recoñecemento xusto. A achega de Carlos Alonso ao noso teatro é incalculable". A entrega do galardón desenvolverase o vindeiro sábado 10 a partir das 20.30 horas, logo da representación de Curva España prevista no marco da actual xeira do festival, que conta cun programa reducido pola pandemia baixo a denominación FIOT en Pausa.