Parque do pasatempo Foto: Dep. Provincial da Coruña
Unha área de 700 metros cadrados do Estanque do Retiro no Parque do Pasatempo será recuperada. A Deputación e o Concello de Betanzos acordaban este 2 de outubro investir un total de 525.000 euros en traballos para reverter a deterioración deste Ben de Interese Cultural. O convenio asinado entre as dúas entidades prevé actuar sobre o que son dous dos elementos máis afectados do parque, o Estanque do Retiro e o seu templete que, segundo indican desde estas institucións "precisa dunha actuación urxente para evitar a súa destrución". As dúas entidades reclamáronlle á xunta a súa implicación na recuperación deste conxunto, declarado Ben de Interese Cultural o pasado mes de febreiro.
En total a Deputación da Coruña achegará 419.944 euros para estes traballos e o Concello os 104.986 euros restantes. As obras incluirán a recuperación de todos os elementos escultóricos, pictóricos e arquitectónicos desta área e estenderanse ao longo dun ano e medio.
