Charlas, visitas guiadas e rutas arredor do traballo do recentemente falecido Andrés Fernández-Albalat centrarán o programa da Semana da Arquitectura da Coruña. A proposta bota a andar o venres 1 de outubro coa declaración do homenaxeado como Fillo Predilecto da Cidade. A este evento sumaranse ao longo dos seguintes días visitas guiadas ás súas obras máis recoñecidas como son a Fábrica de Coca-Cola, o Concesionario de Seat, o Centro de Cálculo de Abanca ou o colexio dos Escolapios. O Concello, canda á Fundación Luis Seoane e ao Colexio de Arquitectos de Galicia, organiza esta iniciativa.
O día 5 inaugurarase na Casa da Cultura Salvador de Madariaga a exposición Andrés Fernández-Albalat Arquitecto. Materiais de arquivo. Obra Coruñesa (1959-1999), comisariada por Antonio S. Río. Ademais destas actividades , desenvolveranse no marco desta iniciativa roteiros guiados pola cidade arredor do traballo do autor e mais un ciclo de conferencias na Fundación Luís Seoane os días 6 e 7 de outubro.
