Nace Culturminho, un novo punto de encontro para cultura na Raia

Entre os vindeiros 6 e 9 de outubro celébrase de xeito virtual Culturminho, o I Foro da Cultura do Río Miño Transfronteirizo. Esta iniciativa, integrada no proxecto Smartminho e financiado con fondos Interreg, procura constituírse como "un lugar de encontro e debate entre axentes profesionais e o público interesado na produción cultural neste territorio". No marco do programa, que se poderá seguir na rede, inclúe o debate "Artes e música no Río Miño" coa presenza de propostas como a Fundaçao Bienal de Arte de Cerveira, o Festival de Cans, o Festival Folk Celta de Ponte da Barca, o Festival de Vilar de Mouros ou o Entre Margens. Caminha-A Guarda.

Outras mesas tratarán as experiencias de cooperación e cultura nesta zona, os proxectos literarios e escénicos ou aspectos técnicos e de financiamento da actividade cultural como parte do programa. No encontro participarán iniciativas como as Comédias do Minho, o Festival de Poesía do Condado, o Play-Doc, a Casa das Artes-Sons do Vez ou o IKFEM de Tui. As inscricións para o evento, de balde, están abertas.