O IKFEM Festival Tui - Valença celebrará a súa 13ª edición do 16 ao 20 de xullo, consolidándose como unha referencia nos encontros culturais transfronteirizos en Europa. O festival, que ten na música de piano e órgano a súa motivación orixinal, comprende arestora unha gran variedade de propostas sonoras, unindo tradición e vangarda cunha programación sorprendente e diversa a través de concertos, encontros profesionais e actividades para todos os públicos, enchendo os espazos máis emblemáticos a ambas marxes do río Miño.
O programa dará comezo cunha gala que unirá á formación CaixaSon, Antonio Orozco e Rita Rocha na Fortaleza de Valença. O mesmo espazo acollerá ao día seguinte a actuación da lusa Milhanas coa colaboración especial de Fillas de Cassandra. Cruzando o río, ao día seguinte o pianista James Rhodes, dará un dos concertos máis agardados, na Alameda de Tui. O festival pecharase o día 20, na Fortaleza de Valença a cargo de Perico Sambeat & Orquesta Jazz Matosinhos, co espectáculo Boreal. No medio tamén terá lugar o Concurso Novas Ondas Sonoras, no que se buscan os novos valores musicais de ambos países e ao que aínda están aberta as inscricións. Tamén haberá un espectáculo de Rock en familia na Alameda de Tui. Cursos e encontros completan o programa, que xa está dispoñible na web do evento.
