Curtocirtuíto reforza a súa aposta galega na nova edición

O Concello de Santiago acollía na mañá deste 24 de setembro a presentación do décimo sétimo Curtocircuíto. O festival audiovisual incrementa a súa aposta polo cinema galego nunha edición na que tamén colle peso a programación en liña. Malia a contar cun programa reducido, o evento mantén as seccións Planeta GZ, dedicada a cineastas do país e mais Supernova, orientada a novos talentos do audiovisual. Como novidade, XX_Novas Creadoras quere explorar o traballo que toda unha xeración de mulleres novas está a desenvolver neste campo no noso país.

O director do evento, Pela del Álamo, destacou do programa, que se desenvolverá entre o 3 e o 11 de outubro vindeiros, a estrea de Lúa Vermella, último filme de Lois Patiño. Canda a este, un ciclo dedicado a Dennis Hopper estreará a nivel estatal a versión restaurada do seu filme Out of the blue. No campo das longametraxes, o festival acollerá as estreas dos últimos traballos de Camilo Restrepo ou de Óscar Alegría, ás que se engaden unha sección oficial composta por 35 filmes de 22 países e propostas paralelas que inclúen performances ou concertos.

As proxeccións, para alén das sedes habituais do evento en Santiago de Compostela, poderán seguirse na plataforma Filmin, mentres as actividades paralelas estarán tamén dispoñibles en liña desde o propio web do festival.