Dúas semanas de Mostra de Teatro Galego en Cariño para evitar aglomeracións

A XLII Mostra de Teatro Galego de Cariño ven de presentar a programación para as dúas semanas que durará este ano adaptándose ás circunstancias sanitarias. Unha das principais medidas que tomou o Concello teñen que ver coa organización: durará dúas semanas en lugar de unha co obxectivo de reducir o número de funcións diarias para evitar aglomeracións e facilitar a desinfección dos espazos. A primeira semana estará dedicada ao teatro infantil e para toda a familia, mentres que a segunda semana centrarase no teatro adulto. En total serán case vinte os espectáculos que se verán do 9 ao 21 de agosto en diferentes espazos do municipio: o auditorio municipal, a Praza do Campín, o local social da casa do concello e de modo itinerante polas rúas do municipio. O teatro na rúa, na Praza do Campín, seguirá sendo gratuíto pero desenvolverase nun recinto pechado ao aire libre para o que se necesitará reservar entrada para acceder. O día inaugural, domingo 9 de agosto, Barafunda representará Aguillóns de Ortegal, unha creación específica da compañía para Cariño que comezará a partir das 12:30 horas de modo itinerante polas rúas do municipio. Ás 20:30 horas terá lugar o acto oficial de presentación na Praza do Campín, no que se entregará o premio do público e o premio do público infantil da pasada edición a Malasombra Producións con ‘Bernarda’ e a Magín Blanco e Teatro Ghazafelhos con ‘A meniña e o grilo máis alá’. A clausura do 21 de agosto correrá a cargo da Companhia Do Chapitô portuguesa coa súa obra Electra’, entre medias pasarán pola localidade costeira algunhas das principais compañías teatrais do país cos seus máis recentes espectáculos.