O labor do debuxante Luís Davila no campo do humor gráfico acaba de recibir un novo recoñecemento. O autor foi galardoado Co premio RiR Contigo 2020 que entrega o Festival RiR de Allariz polo seu traballo no Faro de Vigo cos cadriños da serie O bichero "que cada día nos fan rir e que tanto nos animaron no pasado confinamento" segundo salienta a organización do RiR. A entrega do galardón celebrarase no transcurso deste evento dedicado ás curtametraxes cómicas e que se desenvolverá entre o 2 e o 6 de setembro vindeiros.
Pola súa banda, o Museo do Humor de Fene deu a coñecer a listaxe de galardoados dos seus Premios Curuxa. Desta volta Sebastiá Martí Benedí levou o primeiro premio Curuxa, para maiores de 25 anos, mentres Hugo Feal Permuy se impuxo no Curuxa Nova (categoría de 16 a 25 anos). Robert John Holt Schmelzer e Luciano Ripio Molina alzáronse co segundo posto nestas categorías.
