A Xunta recoñece a billarda como deporte

Unha das vellas arelas dos colectivos dedicados á recuperación de xogos e deportes tradicionais, o seu recoñecemento como modalidades deportivas oficiais, comeza a ser unha realidade. O Consello da Xunta celebrado este 25 de xuño recoñecía oficialmente a billarda como modalidade deportiva no noso país e autoriza a inscrición no Rexistro de Entidades Deportivas de Galicia das entidades que a practiquen.

Este status abre novas vías para a popularización deste xogo tradicional, ao outorgarlle un novo marco legal á súa práctica e facilitar a integración do mesmo nas escolas. Ademais, fará que se teña en conta esta modalidade á hora de crear instalacións deportivas por todo o país. A Liga Nacional de Billarda, que agrupa as competicións deste deporte, aseguraba que esta declaración era o único xeito de garantir a supervivencia desta práctica.

A coincidir con esta declaración, a Xunta adiantou que esta medida supón "un paso previo á creación dunha nova federación na que se incluirán os deportes populares e tradicionais de Galicia e na que xa traballa a Secretaría Xeral para o Deporte". En vindeiras datas publicarase no DOG a orde que oficializa a nova consideración da billarda como deporte.