O Parlamento de Galicia acordou por unanimidade solicitarlle á Xunta que recoñeza a billarda como modalidade deportiva. A Comisión 1ª Institucional, de Administración Xeral, Xustiza e Interior que se celebrou o pasado martes 4 de xuño acordou, a partir dunha proposta do Grupo Parlamentario do Bloque Nacionalista Galego pedir ademais que o Goberno Galego abra "un proceso de diálogo coas entidades que traballan no eido dos deportes tradicionais para avaliar a posibilidade de crear una Federación Galega de Deportes Autóctonos". Do mesmo xeito, reclama tamén "desenvolver un programa de divulgación e expansión da billarda no ámbito educativo e no conxunto da sociedade", así como fomentar as competicións de billarda e mais incluír os espazos para o xogo no Plan de Infraestruturas Deportivas de Galiza.
A solicitude responde á proposta que os representantes da Liga Nacional de Billarda achegaron ao Parlamento o pasado mes de abril. O recoñecemento como deporte garantirá, segundo os colectivos agrupados na Liga, a supervivencia deste xogo tradicional e facilitará a súa extensión.
