A crise da Covid 19 impacta máis na cultura do que noutros ámbitos

Conxuntura estatística do ámbito cultural é o título do documento de traballo que acaba de facer público o Observatorio da Cultura Galega, servizo dependente do Consello da Cultura Galega (CCG). Neste texto, a entidade analiza o impacto que está a ter a crise derivada da Covid-19 sobre o sector cultural do país, e conclúe que o mesmo está a ser superior ao doutras industrias. Deste xeito, entre as conclusións da análise apúntase que a perda de empregos culturais entre os meses de foi dun 6,3%, dous puntos por riba da media galega. En total 667 empresas do sector cultural solicitaron un ERTE, que afectou a 4.019 persoas, o 28,7% da forza de traballo do conxunto. Estes expedientes foron máis frecuentes en empresas de artes gráficas (243 expedientes) e nas de actividades de creación, artísticas e espectáculos (152 expedientes).

A desaparición de empregos neste período afectou a 1.002 cotizantes, coas actividades de creación, artísticas e espectáculos como as máis afectadas cunha mingua do do 10,4%. As cinematográficas, de vídeo e de programas de televisión, gravación de son e edición musical foron as seguintes que perderon máis empregos e ficaron dun 10% menos. Como dato esperanzador, o informe sinala que as afiliacións á seguridade social entre abril e maio medraron máis na cultura (+2,7%) do que no conxunto da economía (+1%).

O impacto deixouse sentir tamén de xeito particular na creación de empresas culturais, das que entre xaneiro e maio naceron 44, 11 menos que no mesmo período do ano anterior. Tamén a exportación deste tipo de produtos se viu particularmente afectada pola crise, xa que minguou un 39,4% fronte ao 23,9% do conxunto de vendas ao exterior.

De cara ao futuro, este estudo advirte que "só o 57,8% dos fogares galegos prevé que poderá saír cear, a cafetarías, ao cinema e ao teatro nos próximos tres meses". A cifra supón un 5,5% menos do que no trimestre anterior e a marca cifra máis baixa dos últimos dous anos.