O Gaiás reivindicará o legado da xeración Nós cunha nova exposición en outubro

Despois de "Galicia, un relato no mundo" chegará en outubro ao Museo Gaiás da Cidade da Cultura a segunda das grandes mostras programadas para celebrar o Xacobeo 2021. Trátase de "Galicia, de Nós a nós", e estará centrada no centenario da publicación da emblemática revista Nós e o legado do grupo de intelectuais que marcaron a cultura galega do século XX. A mostra estará comisariada polos profesores Afonso Vázquez Monxardín e Ana Acuña. Tras a mostra de Compostela, a exposición itinerará a Ourense con todos os seus contidos en febreiro de 2021. Segundo a Xunta, "o proxecto reivindicará a vixencia dos principios defendidos pola xeración Nós, como a dimensión universal da cultura galega, a necesidade de ter unha voz propia no mundo e o carácter aberto e integrador de Galicia".