Jardín de Mamá 4, Nelson Villalobos. Fotografía do Museo do Mar.
Un total de 62 pezas do pintor, debuxante, escultor e serígrafo Nelson Villalobos compoñen a exposición Blanquísima su presencia, coa que o Museo do Mar de Galicia retoma a súa actividade en Vigo. O centro abría este 28 de maio a nova mostra, que se poderá ver ata o vindeiro 29 de xuño, e que achega por unha banda "14 pezas recentes en gran formato, a meirande parte delas dedicadas á nai do autor" e pola outra "48 obras de menor tamaño que constitúen unha retrospectiva da súa traxectoria", segundo adianta a Consellería de Cultura.
Entre os traballos do autor cubano que se presentan está unha peza creada durante o confinamento. "A historia deste cadro remóntase meses atrás, cando o artista estaba preparando unha exposición no Museo do Mar de Galicia centrada na relación entre Galicia e Cuba, un proxecto que se viu interrompido debido á crise sanitaria", adianta a Consellería na presentación da mostra. "Precisamente, este novo cadro interpreta a relación entre Galicia, Cuba, Vigo e A Habana e representa algúns símbolos destes territorios como o Apóstolo Santiago, as Illas Cíes, o Malecón ou a Catedral da Habana".
