Paula Cabaleiro nun acto da Deputación de Pontevedra en 2019. Fonte: Facebook de Paula Cabaleiro
A comisaria de arte e dinamizadora cultural Paula Cabaleiro ocupará o posto de Directora de Cultura da Deputación de Pontevedra, segundo anunciaba na mañá deste 22 de maio a presidenta da entidade Carmela Silva. Cabaleiro foi seleccionada no concurso que institución provincial abrira o pasado mes de febreiro para cubrir esta praza, para o que se tivo en conta a experiencia previa en postos de dirección e en ámbitos culturais e, canda ao currículo, "un proxecto de dirección e organización da área de cultura no que se expoñan as principais liñas de actuación" para a mesma.
O posto, que ten entre as súas funcións "impulsar e coordinar as políticas culturais da Deputación Provincial de Pontevedra nas súas diferentes liñas de actuación e desde a base da planificación estratéxica" conta cunha retribución bruta de 60.985 euros ao ano. O proceso de selección correu a cargo dun órgano técnico composto polo secretario da Deputación, a xefatura de Servizo de Cultura e mais a xefatura do Servizo de Recursos Humanos e Formación.
