O Auditorio de Galicia busca director

A concelleira de Acción Cultural de Santiago, Branca Novoneyra, presentaba o pasado luns a convocatoria para cubrir a praza de director-xerente do Auditorio de Galicia. Por vez primeira óptase por un proceso de selección aberta para ocupar este posto. As bases que presenta o Concello priman entre os méritos a experiencia, dun mínimo de cinco anos, en postos de dirección similares, así como ser titulados superiores dominar idiomas, ter dispoñibilidade horaria ou a experiencia "en liderado e dirección de equipos, en márketing e comunicación, ou na captación de patrocinios e na xestión de fondos europeos". Canda a isto terá especial peso no proceso de selección a proposta dun programa quinquenal para o centro que deberán presentar os aspirantes.