Galaxia e a Deputación de Pontevedra crean a Escola de Letras

"Tod@s temos unha historia que contar". Este é o lema baixo o que a Editorial Galaxia e mais a Deputación de Pontevedra presentaban este 20 de maio a Escola de Letras, un proxecto que se reclama como pioneiro en Galicia e que quere ofrecer ás persoas a posibilidade de contar "as súas historias" e "converter en literatura as súas vidas", segundo explicaba o director de Galaxia Francisco Castro. A iniciativa, aberta a calquera persoa a partir de 16 anos, desenvolverase nas sedes da Deputación en Pontevedra e en Vigo e pretende comezar cun obradoiro de escrita creativa na segunda quincena e xuño en Vigo. Logo desta, están previstas outras nove accións formativas máis a partir de setembro, cun máximo de 15 persoas en cada unha.

Autoras e autores "de dilatada traxectoria, primeiras espadas da literatura galega e con experiencia na dirección para todos os chanzos de idade" encargaranse de impartir estas formacións, segundo adianta Galaxia no seu web. Para alén do obradoiro de Escrita Creativa Básica, o programa inclúe outros como "o obradoiro Literario de Perfeccionamento, o de Poesía de Perfeccionamento e o Literario para Maiores" en Vigo e os de "Escrita Creativa Avanzada, o obradoiro Literario de Iniciación, o Literario Avanzado e o obradoiro de Poesía Básico" en Pontevedra.

A iniciativa incluirá tamén encontros con profesionais do mundo do libro, recitais ou a edición dun volume colectivo con traballos desenvolvidos no seo do proxecto. A inscrición á escola abriu por correo electrónico este 21 de maio.