José Manuel Rey dirixirá o Museo de Pontevedra

O Boletín Oficial da Provincia publica hoxe o nomeamento de José Manuel Rey como director do Museo de Pontevedra. A Deputación presentaba este sábado o novo responsable do centro, escolleito por unanimidade logo dun concurso público ao que se presentaron nove candidaturas. Segundo destacou o vicepresidente da deputación César Mosquera, a proposta presentado por Rey "foi claramente a mellor", ao que se unen, ao seu ver os méritos de que "é unha persoa de Pontevedra e que lle quere a Pontevedra", o ter traballado no propio museo e o contar coa capacitación necesaria para o posto. O deputado de Cultura Xosé Leal, pola súa banda, destacou que o novo director ten o reto de "facer deste Museo unha referencia a nivel internacional".

O novo director, pola súa banda, sinalou que "o museo non pode ser un mausoleo, e abrilo á sociedade non significa renunciar ao rigor científico", de xeito que quere apostar por "unha práctica museal baseada no diálogo, no debate crítico, e no fomento do acceso universal a todo tipo de públicos", co desafío de "adaptarse a un ritmo vertixinoso a todos os cambios que estamos a vivir nos últimos anos".

Rey, licenciado en Xeografía e Historia, está especializado na xestión do patrimonio arqueolóxico e na arte rupestre prehistórica. Fai parte do Corpo Facultativo Superior da Xunta de Galicia desde 1994, dirixe desde 2011 o Parque Arqueolóxico da Arte Rupestre de Campo Lameiro e é xefe de sección III no Servizo de Arqueoloxía da Xunta desde 1999. É autor de diferentes libros e artigos sobre cuestións de patrimonio e arqueoloxía.

O nomeamento prodúcese despois de que a Deputación desestimase o recurso que presentara a Asociación de Amigos do Museo ao proceso de selección. Esta entidade reclamaba que a Deputación non tiña competencia para seleccionar o novo responsable do centro ao estar as competencias sobre museos nas mans da Xunta.